Konzärt
Spiu & Spass
Foodtruck
Drinks
Ar Spätsummerchiubi chöi mir, wisechs fürne richtigi Chiubi ghört, so richtig zämä feschtä und ä gueti Zyt verbringä. Ufem charmante Areal vom Pfadiheim Rüfenacht wirds Platz ha für Spieli, guets Ässä und Trinkä sowie fägigi Livemusig. Uf di nimmermüede Tanzmönsche wartet bis spät id Nacht äs legendärs Plattätäuer-Quartett. Oder mä laht de dr Tag am romantische Lagerfüür la usklinge. Eis chame iz scho sägä, ds Wätter wird guet und mir fröie üs FESCHT!
Programm
ab 14:00
Spiu & Spass
Ufem Rasäplatz chasch di vertörlä mit Spikeball, Kubb, Mölkky und Pingpong. Oder du spiusch im Schatte e Rundi Tichu oder Jass.
17:00
Konzärt EKK
Mir sind EKK, e früschi Band us Winterthur. Das sind de Alex, de Mathis, de Adi, de Claudio und de Mario. Mir mached Musig, wie sie ois gfallt – vo Rock, Hip Hop bis Bossa Nova Chörli isch ales debii. Hauptsach eigewilligi Text uf Schwiizerdütsch und Party uf de Bühni. Sinder bereit uf es Füürwerch?
19:00 & 21:00
Konzärt People the People
Mir si “People the People”. Ä Gruppä vo 4 kreativä, guetussehendä, talentiertä u (mängisch) verrucktä Jungs. Mit chraftvouä Strophänä, igängigä Röfräs u wunderschönä Gsangsharmoniä verbindä mir verschideni Schore wiä Rock, Folk u Soul. Mir verbreitä d Botschaft vom Fridä, vor Liebi u vor Lebändigkeit u si hiä, für d Lüt wider zrügg zu dä Lüt ds bringä. Ergänzt wärde mir vo üserä 4-chöpfigä Hornsection, wo öich ganz sicher wird umhouä! Machet öich bereit für d Lüt, Lüt.
ab 22:00
Party mit DJ-Quartett
DJ Föntu & Hugi2000 gäbä es lang ersehnts Kombäck, füre DJ Hund gits ä Füürtoufi und dr DJ one more time isch bereits wiit übers Ämmitau use bekannt. Was wosch no meh!
Sunnti
Brunch
We du spät ir Nacht nümm hei wosch ga, nimmsch eifach ds Zäut oder dr Cämper mit und gniessisch am nächschtä Tag no ä feine Brunch.
Ässä & Trinkä
Catering zum Topf
Üsä Fründ Luca Stucki wird üs mit emne vegetarische Menü verwöhne. Mit sire Firma Zum Topf chochet er im Käpt’n Holger u organisiert Ässä als Catering u im Foodtruck für Events. Ä Guetä!
Bring di eiget Bächer
Ou für ds Trinke isch gsorget. Vom Zapfhane gits früsches Bier. Am Abfausack ds lieb bringsch bitte di eigät Bächer mit. U ou e chlini Bar mit säuber gmachtem Ingwerer, Irish Red Ale vo Jucherbräu, paar Drinks u Softgetränk wirds ha. U für früsches Wasser sorgt e schönä Brunne im Garte. Proscht!
Location
Pfadiheim Rüfenacht
Ds charmantä Gländ vom Pfadiheim Rüfenacht isch dr perfekt Ort für üsi Chiubi. Dr gross Rase biätet üs viu Platz zum Konzärt losä, ässä und spilä. Di schöni deckti Terassä isch bi jedem Wätter di perfekti Partyflächi. U di gmüätlechi Füürsteu ladät zum Verwiile i.
Adrässä: Moosweg 3, 3075 Rüfenacht
Du bruchsch no Tipps fürd Areis? Mir hei dir aues wodä muesch wüssä zämägsteut.
Über Üs
Aus het agfangä mitem Tippspiu während dr letschtä Fuessbau-EM. Im Chreis vodä ehemaligä Sportstudäntä hetsech dr einzig, wo ke Ahnig vo Sport het, düre gsetzt. Si Name isch Hugi u är het näbst viu Ruhm und Ehr d Ufgab becho, mit däm Gäud es Feschtli ds organisiere für di ganzi Gruppe. Da d Luscht uf lustigi Wettä o nach dr EM bis hüt unbrämst isch, hetsech dr Pot nadisna erhöht. Es hetsech äs OK biudet und voneme chline Feschtli isches zur Spätsummerchiubi gwachsä.
Dominik Hug
Chief Master
Simon Takacs
Dealer
Pascal Meierhans
Stewardess
Michel Kilchhofer
Glamour
Adrian Lauper
Glamour
Amäudig
Ad Chiubi muesch du kei Gäud mitnäh, es isch alles inklusive. Du ungerstüzisch üs mit dire Amäudig und erä vo dir gwäutä Biitragskategorie. E grossä Teil vom Fescht wird mit em Tippspiupot u dä zauriche witere Wettä finanziert. Fürä Räscht wei mir üsi Chöschte decke. Je nach Bierdurscht und spänndablem Portemonnaie fürd Unterstützig vo üsne Bands gits die drü Kategoriä:
40.-
I bi eifach da
50.-
Kulturliäbhaber
60.-
I sprängä dr Rahmä!
Bisch drbi? Mäud di sofort mit em fougändä Formular a. Drmit mir gnue Ziit hei für aues ds organisierä, si mir um dini früähzitigi Amäudig froh. Ameldeschluss isch am 31. Ouguscht 2022. U eis chöi mir dir ou jitz scho versprechä: Ds Fescht wird dr Hammer!