Spätsummerchiubi
Spät- summer- chiubi
2. Septämber 2023
Pfadiheim Rüfenacht
Ar Spätsummerchiubi chöi mir, wisechs fürne richtigi Chiubi ghört, so richtig zämä feschtä und ä gueti Ziit verbringä. Ufem charmante Areal vom Pfadiheim Rüfenacht wirds Platz ha für Spieli, guets Ässä und Trinkä sowie fägigi Livemusig. Uf di nimmermüede Tanzmönsche wartet bis spät id Nacht äs legendärs Plattätäuer-Duo wo ganz nach äm Motto Wunschkonzärt eui Liäblingssongs spiut.. Oder mä laht de dr Tag am romantische Lagerfüür la usklinge. Eis chame iz scho sägä, ds Wätter wird guet und mir fröiä üs FESCHT!
Programm
ab 14:00
Spiu & Spass
Ufem Rasäplatz chasch di vertörlä mit Spikeball, Kubb, Mölkky und Pingpong. Oder du spiusch im Schatte e Rundi Tichu oder Jass. Näbäbi chasch mit viunä tollä Lüüt ploudärä, äs Bier trinkä u d Sunnä gniessä.
Wemer Glück hei, wärdä mir no vo luschtigä Darbiätigä überrascht. Hesch Luscht uf paar Minutä Ruum? Mäud di bim OK we du di Plattform für Comedy, Musig, Theater, Zoubärä oder ähnlechs wosch nützä!
Beschtätigti Darbiätigä:
Retus Hybes
Als Popsänger mit Gefühl interpretiere ich meine Songs in meinem eigenen Stil
Koller Unplugged Session
Mundart Pop Rock
20:00
Konzärt Tonic Vibes
Erfrüschend, spannend u vouer Energie. Tribendi Gruufs, fönki Riffs, sphärischi Kläng u ä mitrissendi Stimm gäbe ar Sanggauer Bänd ihres unverkennbarä Margäzeichä. Das si d Zuätatä vo Tonic Vibes wo zämägmischt zu rockigä Songs paart mit poppigä, melodiösä Elemänt füährä. Mit dr Viufaut vo ihräm Repertoire schaffä si dr Spagat zwüschä Pop, Funk, Rock u Indie. E sympathisch-bodäständigi Truppä wo sit über 10 Jahr zämä musiziärt. Hiä hei sech 5 Jungs gfungä wo d Chemie stimmt. Das zeigä si mit ihräm tanzbare Sound wo abwächsligswis Härz u Hüft trifft.
22:30
Konzärt Back Doors Men
Dr Schlagzüger Peter Fischer, Gitarrist Anton Brüschweiler u Sänger Michael Gsteiger hei sech ir Aukohou-Entzugsklinik «Zum durstigen Bruder» in Chnofligä lehrä kennä. Baud het sech usägsteut, dass si ziitläbens äs grossäs Vorbiud hei gha: Jim Morrison, dr charismatisch u trinkfescht Frontmaa vo dr legendärä Band Doors. Zum d Qualä vom Entzug u di drmit verbundeni Längwili lindärä hei di drü Suchtchrankä agfangä Doors-Songs ds tschäämä. Ihrä betreuendi Sucht-Therapeut, dr Hobby-Keyboarder Ueli Kempter, isch vo derä Insassä-Bänd – nid ds letscht us therapeutischä Gründ – sofort begeischtärät gsi. Spontan het är sech aus Keyboarder abotä. So si d Back Doors Men entstandä, di drogäfreischti Bänd vor Wäut. Darbotä wärdä usschliässlech Doors-Klassiker. Doors bis zum abwinkä auso.
aschliessend
Party mit Hugi2000 und DJ Hund
Nach dä Live-Bänds sorgä dr rutiniärt Hugi2000 und dr ufsträbänd DJ Hund drfür, dass d Tanzflächi bis zum Morgägrauä unsicher gmacht wird. Ganz nach äm Motto Wunschkonzärt wird ou dini Musig vo dä DJ’s gspiut. Aus wo du drfür muäsch machä, isch di Liäblingssong diräkt im Amäudeformular agäh. U denn heissts: Party all night long!
Sunnti
Brunch
We du spät ir Nacht nümm wosch hei ga, nimmsch eifach ds Zäut oder dr Cämper mit und gniessisch am nächschtä Morgä no ä feine Brunch mit auem drum u dra. Seeeehr empfählenswärt!
Ässä & Trinkä
Catering zum Topf
Üsä Fründ Luca Stucki wird üs mit emne vegetarische Menü verwöhne. Mit sire Firma Zum Topf chochet er im Käpt’n Holger u organisiert Ässä als Catering u im Foodtruck für Events. Abem 6i gits das feine Znacht, ä Guetä!
Bring di eiget Bächer
Ou für ds Trinke isch gsorget. Vom Zapfhane gits früsches Bier. Fürd Biersommeliers hets ä gwüssi Ladig vo Fränkischem Rotbier vo Jucher Bräu, äs het solangs het. Oder äs Gläsli Wii us dr feinä Guttärä. Am Abfausack ds lieb bringsch bitte di eigät Bächer mit. Hesch Luscht uf Cocktails? De nimmsch dr Schnabatz mit u chasch di bide Softgetränk bedienä. U für früsches Wasser sorgt e schönä Brunne im Garte. Proscht!
Ort
Pfadiheim Rüfenacht
Ds charmantä Gländ vom Pfadiheim Rüfenacht isch dr perfekt Ort für üsi Chiubi. Dr gross Rase biätet üs viu Platz zum Konzärt losä, ässä und spilä. Di schöni deckti Terassä isch bi jedem Wätter di perfekti Partyflächi. U di gmüätlechi Füürsteu ladät zum Verwiile i.
Adrässä: Moosweg 3, 3075 Rüfenacht
Du bruchsch no Tipps fürd Areis? Mir hei dir aues wodä muesch wüssä zämägsteut.
Über Üs
Aus het agfangä mitem Tippspiu während dr Fuessbau-EM 2021. Im Chreis vodä ehemaligä Sportstudäntä hetsech dr einzig wo ke Ahnig vo Sport het düregsetzt. Si Name isch Hugi u är het näbscht viu Ruhm und Ehr d Ufgab becho, mit däm Gäud es Feschtli ds organisierä für di ganzi Gruppe. Dür witeri luschtigi Wettä nach dr EM hetsech dr Pot nadisna erhöht. Es hetsech äs OK biudet und voneme chline Feschtli isches zur Spätsummerchiubi gwachsä wo im Septämber 2022 zum erschtä Mau het stattgfungä. Wüu das Ganzä ä vouä Erfoug isch gsi, stigt im Septämber 2023 di 2. Usgab vor legendäre Spätsummerchiubi. Natürlech wieder teilfinanziärt dür es Tippspiu zur Fuessbau-WM 2022 u witerä luschtigä u weniger luschtigä Wettä.
Dominik Hug
Chief Master
Simon Takacs
Dealer
Pascal Meierhans
Stewardess
Michel Kilchhofer
Glamour
Adrian Lauper
Glamour
Amäudig
Ad Chiubi muesch du kei Gäud mitnäh, es isch alles inklusive. Du ungerstüzisch üs mit dire Amäudig und erä vo dir gwäutä Biitragskategorie. E Teil vom Fescht wird mit em Tippspiupot u dä zauriche witere Wettä finanziert. Fürä Räscht wei mir üsi Chöschte decke. Je nach Bierdurscht und spänndablem Portemonnaie fürd Unterstützig vo üsne Bands wäusch du eini vo dene drü Kategoriä. U ou Ching si wiukomme u dörfä bis 16ni gratis cho.
50.-
Gizgnäpper
60.-
Bünzli
70.-
Baba
Bisch drbi? Mäud di sofort mit em fougändä Formular a. Drmit mir gnue Ziit hei für aues ds organisierä, si mir um dini früähzitigi Amäudig froh. Ameldeschluss isch am 31. Juli 2023. U eis chöi mir dir ou jitz scho versprechä: Ds Fescht wird dr Hammer!